في ذكري30يناير..وتظاهرة بكرة

تحل علينا يوم بعد غد الإثنين ذكري تظاهرة ال30يناير،التي نظمتها مجوعات من الشباب والطلاب كحركة شرارة وقرفنا والجبهة القومية المتحدة وغيرها، وكانت المظاهرات قد انتظمت البلاد وكادت ان تنجح لو لا انعدام التنسيق بين المجموعات،والخروج دونما تاكتيك وتنظيم يقوي شوكة المجموعة امام قمع الأجهزة ألأمنية.فقد شاب التحركات تراخ وعشوائية ساعدت قوات الأمن من السيطرة ومن ثمة اعتقال اكبر عدد من الشباب تم تعذيبهم بقسوة،ولا يزال بعضهم يقبع في معتقلات العذاب ينتظر الفرج والحرية علي ايدينا.الآن وقد تداعي الشباب الي الخروج في يوم غد 29يناير،قبل يوم من الذكري في مظاهرات تعم ارجاء الوطن،وحتي لاتكون الهوبة كسابقتها فيحتويها أمن النظام ويختطف ويعذب اعضاءها، كدي نقيف عند بعض الاشياء ونتذكرها قبل الخروج:

المهم قبل الخروج الي الساحات لازم  أي زول  يكون خاطي في راسه الحاجات دي أولاً-هناك قوة امنية ضخمة و شرسة من جهاز الأمن والشرطة والكتائب الجهادية التابعة للنظام  كلها حتكون في انتظارك مش عشان تحرسك، لكن عشان تقمعك، وهذه القوة حتعمل باقصي طاقتها عشان تفض المظاهرات،وممكن انت تتعرض للضرب و تتعرض عيونك لغازات مكثفة ووارد جداً يعتقلوك،وكمان ممكن تتعرض للضرب بزخيرة حية .ثانياً-لا تنسي ان نظام الإنقاذ يتكون من مجموعة من المجرمين ومطلوبين للعدالة المحلية والدولية وهم يتحصنون بالسلطة خوفاً من الملاحقات القانونية،ومجموعة اخري طفيلية مستفيدة من بقاء هذا النظام من اجل منافعها التجارية والمالية عشان كده كلا المجموعتين حتستميت في المقاومة من اجل البقاء بالسلطة وهم حيعملوا علي قمع اية مظاهرة تندد بهم.ثالثاً:لاتنسي عزيزي أن هناك قوة غربية تريد بقاء هذا النظام في السلطة لأطول مدي لتنفيذ اجندتها عبر الضغط والترهيب والترغيب لأنها وجدت أن هذا النظام هو الإنسب لها لأنه يخدم اغراضها وينفذ أوامرها التي لايمكن تنفيذها في ظل وجود نظام ديمقراطي،لذلك قد يتناسون أمرك كما تناسوا الشعب اليمني وهو يذبح ،وضمنوا حصانة لعميلهم علي صالح من الملاحقة،في الوقت الذي يبكون فيه الشعب السوري.

*لكن في المقابل يجب أن تضع في رأسك هذه ايضاً:

1-تذكر أن الخوف من الموت لن يأخره ،وكل شئ مكتوب ومقدر بزمان ومكان.

2-تذكر ياخي أن نظام الإنقاذ مش اقوي أواعتي من نظام القذافي أو نظام مبارك أو نظام بن علي،والشعب المصري والليبي والتونسي هم بشر زينا لكنهم قالوا:لازم ناخد حريتنا وبأي تمن، فاخدوها.

3-تأكد انك لو انتصرت علي قوة الخوف الجواك، ممكن تنتصر علي اية قوة في الأرض.

4-لازم تتذكر بانك اقوي من العسكري (الهلفوت) القدامك ده، لأنك انت طالع للشارع وبتناضل من اجل قضيتك وهي الحرية والعدالة والكرامة، لكن العسكري ده زول ضعيف وبيحارب بالوكالة عشان ماهيته ماتقيف،وبشوية صبر وثبات منك ممكن تقنعه وتخليه يكون معاك، لأنه هو واحد من ابناء هذا الوطن وهو عارف الظلم الفساد، وكمان بطنه طامة من البيحصل ده لكنه خايف علي اكل عيشه.

5-لازم تتذكر ان العالم كله يشهد باننا ابنا الرجال والنساء الذين اسقطوا نظامي عبود والنميري الديكتاتوريين،فكيف نقبل بالعيش تحت وطأة نظام الإنقاذ؟ فلو كان العيش هكذا مشرفأ أو ممكناً لما ثار اباؤنا وامهاتنا ضد النظامين السابقين الذين بكل المقاييس أفضل من هذا النظام باشواط.

6-ماتخاف من قلة عدد المشاركين في المظاهرة، فالآن الشعب السوداني كله جاهز للانتفاضة ضد هذا النظام، لكن كل شئ داير بداية متينة، فلو ثبتنا يوم واحد فقط،بكره السودان كله حيطلع الشوارع ويتجمع في الساحات.المشكلة كلها كيف نثبت لمدة(24)ساعة فقط.

7-مايوهموك بالسؤال:منو البديل؟ ياخي البديل هو الدستور.دستور قومي وطني شامل.وبعدها مش مهم البيحكم منو، لأنه الدستور ده ببقي زي الكاتلوج،مافي زول بيقدر يتجاوزه.شوف اي زول يكون امام ويصلي بالناس، فقط لأن القران هو دستور العبادة والناس كلها بتعرف الصاح من الغلط،ولو الإمام غلط ممكن أي زول يصححه.

8-كمان اتذكر قول الشاعر:لايسلم الشرف النبيل من الأذي.. حتي يراق حوله الدم.وايضاً قول الشاعر:اذا الشعب يوما اراد الحياة..فلابد ان يستجيب القدر.وعشان نطلع من كابوس الإنقاذ هذا يلزمنا ان نضحي بكل شئ، فمش مهم اموت انا او انت او غيرنا، لكن المهم هو أن نمضي في المسيرة و ينبغي أن نتعاهد  مع انفسنا علي ان لا نترك  القضية، فالشهيد  والجريح بيكونوا سعيدين جداً لو نحن واصلنا النضال وحررنا الوطن من ارباق الظلم والديكتاتورية.

9-اعلم ان الاحداث في هذا العصر اصبحت لاتخفي علي عين ومن وحي الثورات الراهنة اضافة الي رقابة المنظمات الحقوقية لاعمال هذا النظام وتتبع فظائعه،فإن هذا النظام لن يستطيع ارتكاب مجازر بحق الشعب.بعدين ما تنسي أن القوات المسلحة لن تقف مع نظام البشير ضد الشعب السوداني،لأنها هي ذاتها مظلومة ومهمشة.

*هذه كلها بشريات يجب ان نتحفز بها، وانا متاكد كل واحد منكم يعرف من اسباب انجاح الثورة اكثر مما اعرف انا، فكدي كل واحد منا يكتبها علي ورقة ،ويركز علي النقاط المهمة عشان نجمعها ونقنع بها كل مشكك في قدرتنا علي النجاح وكمان نتحدي بها انصار النظام.

*واستباقاً لهذه المظاهرات قامت اجهزة امن النظام بحملة اعتقالات وسعة وسط النشطاء، فقد اعتقلت خمسة شبان من حركة قرفنا يوم اربعاء بعد ندوة لهم وهم:

 ناجي موسى ،عمار ضرار ،غازي الطيب ،محمد محجوب وشريف كمال واختفي اثنين. وايضاً تم اعتقال اربعة من حركة شباب من اجل التغيير(شرارة) وهم:خلف سعيد ، مجدي عكاشة ، حاتم شنب وياسين.