ياخي..لا تأهلن لا تسهلن..
ياخي..لا توادد لا تحاضن..
********
جيتك محمّل بالمـودة ***وبالأشــــــــواق نويت أصابحــك
والفرحة بيك مالية عيوني***من لهفي ليك جريت احاضنك
اللحظة ديك ثارت عواطفي*** وكترت قول:والله مشتاق لك
إلا انت وبكل بــرودة *****حطمت قلـبي الكــان مـلاذ لــك.
ياخي..لا تأهلن..لا تسهلن.
ياخي..لا توادد..لاتحاضن.
أبيت ياظالم لي توادد*** و تحاضني ويزول اسـايا
أبيت تاهلن بي تسهلن***أو كان تعيرني حتي عناية
بكل بساطة مشيت لحالك***وسبتنـي واقف برايـا
و فتني وجراحي تنزف***وانت طبيبي وكــل دوايا
والعيون فاضت دموعها***والنار بتحـرق في حشايا
لو هان عليك البي ده كله****ارحل انت..والله معايا
ياخي..لا تأهلن..لا تسهلن
ياخي..لا توادد..لا تحاضن.
وريني يازولي البريدك**شنو الحصل عشان لي تظلم
أكان وشاية احكيها ليّا***وكان ظنون انساها ارحـم
ما أنا الرسمتك في فؤادي***طول الليالي بيك بحلـم
تري الجفاء انت أبتديته***وزي ما قالوا:البادئ أظلم
صدقني لو نسيته ريدك***ما بنفعك تترجـي تعشـم
ليك الخيار ياسيدي واحسم****نتصافي أو.. والله تندم
ياخي..لا تأهلن..لا تسهلن.
ياخي..لا توادد..لا تحاضن.
ما البينا كان نبراس للإلفة***والعشق والحنان والخوة
ما كنت ليك نور عينيك***وكنت لي ترياق وسلـوي
تجود علي بي السمايح***وبمن عليك بي كل حلــوة
من بينا كان بتشيع محبة***تطوف الكون نغم وغنوة
حياتنا كانت جنات عدن*****وكنا فيها أدم وحـــوا
انشالله ..لا تأهلن لا تسهلن.
انشالله ..لا توادد لاتحاضن
******
لطيف الأحمد
يونيو2011م
يونيو2011م
No comments:
Post a Comment
حبابك عشرة